Стана редовна пракса при поголеми врнежи на дожд во регионот патот А3 на релација Делчево-Кочани да биде блокиран од страна на апокалиптични одрони на огромни карпи кои што секојдневно ги загрозуваат безбедноста и животот на патниците кои сообраќаат по овој пат.
Овој огромен проблем на жителите на крајниот исток од државата, особено на жителите од Делчево и Македонска Каменица е присутен повеќе години назад без слух кај надлежните за трајно решавање на истиот. Во изминатите 3 години во неколку наврати пратеници од опозицијата предлагаа во буџетот на владата за овие години да влезе финансирање на изградба на планираното автопатско решение Црна Скала- Делчево, Бигла-Виница, но ваквите предлози беа отфрлани од страна на пратениците на СДСМ.
Клучното прашање кое ги тишти граѓаните кои мораат да патуваат при вакви животно-загрозувачки услови е кога ќе се создадат услови за изградба на новиот автопат со што конечно ќе можат да се почувствуваат како рамноправни жители на оваа држава?
Според најновите информации од ЈП Македонија Пат, Сообраќајот на патниот правец А3 Кочани – М.Каменица, на делницата од Истибања до брана Калиманци, кај м.в. Ајдучки Камен, е целосно во прекин поради одрон. За лесните патнички возила сообраќајот се пренасочува преку регионалниот патен правец Р2345 Кочани – Виница – Бигла – Делчево. Тешките товарни возила и автобуси се пренасочуваат преку регионалниот патен правец Р1304 Кочани – Виница – Берово – Делчево.
