Денеска со мал пригоден симболичен настан беше отворена Канцеларија за комуникација со граѓаните, на пратеникот Миоле Лефков од редовите на ВМРО-ДПМНЕ во Кочани. Оваа канцеларија е предвидено да биде место од каде граѓаните ќе можат да се информираат и да се вклучат во работата на Собранието на Република Македонија, преку комуникација со нивниот пратеник Миле Лефков.
Канцеларијата се наоѓа на ул.”Раде Кратовче” бр.1 во бараката веднаш до зградата на Општина Кочани и истата ќе биде отворена секој работен ден од 10:00 до 15:00ч. Притоа во канцеларијата има контакт телефонски број 072 263 072 преку кој ќе може да се закаже состанок и оствари комуникација од интерес на било кој граѓанин на општина Кочани.
„Канцеларии за контакт со граѓаните“ е проект кој Собранието го започна во 2003 година и го реализира со помош на НДИ, УСАИД, ИПД, Швајцарската агенција за развој и соработка и ЗЕЛС. Во секоја отворена канцеларија во општините работи асистент, кој му помага на пратеникот. Преку непосредна комуникација со избраните претставници, граѓаните имаат можност за размена на информации, предлози и сугестии, со цел да се зголеми нивното учество во работата на Собранието.
