Овој викенд , на 29 и 30 јуни, во Прилеп и на „Рудина“ кај Долнени, по 44 ти пат ќе се одржи Меѓународниот фестивал на народни инструменти и песни „Пеце Атанасовски“. Првиот регионален натпревар во гајда во Прилеп и Долнени е одржан во 1974, на иницијатива на гајдаџијата од светски глас, Пеце Атанасовски, етномузикологот Живко Фирфов, Илија Лашкоски и неколкумина други ентузијасти.
Со поддршка на тогашните општински и државни институции, тој прераснува во Републички фестивал на народни песни и инструменти „Марко Цепенков“. Од 1996 година, после смртта на Пеце Атанасовски, Фестивалот го носи неговото име.
Организаторите на овој фестивал, очекуваат околу 250 натпреварувачи. Фестивалот и концепциски и територијално, е поделен на два дела. На прес конференција, Лашкоски истакнал : „Во петок, на камената бина во Прилеп, ќе настапат изведувачи од западниот дел на Македонија и од општина Прилеп.
Во сабота на „Рудина“, кај Долнени, пред публиката ќе се претстават натпреварувачи од источниот дел на Македонија. Очекувам фестивалот да биде на високо ниво, да докажеме уште еднаш дека овој фестивал кој е единствен од ваков вид, секој ден ни возвраќа со нови млади натпреварувачи, кои прво ја засакуваат, а потоа и ја негуваат изворната музика“
