Пред повеќе години, познатиот руски режисер Андреј Кончаловски (постар брат на режисерот Никита Михалков), давајќи интервју за западен медиум, бил прашан дали е навистина против демократијата, бидејќи не се согласувал со некои Западни решенија. Кончаловски одговорил дека не е против демократијата, но дека некои решенија/практики не можат по авоматизам секаде и секогаш да бидат применувани, додавајќи дека лично би сакал во Сибир да никнат палми и банани , но дека тоа е невозможно заради поднебјето.
Со други зборови, кога се работи за практикување на одредени економски и политички системи, секогаш треба да се има предвид историјата, традицијата, како и вредностите што една земја/држава ги има. Во спротивно, се врши неприродно/вештачко калемење, кое доведува до несакани состојби. Затоа, Аристотел бил против Платоновата идеја за создавање идеална држава, бидејќи мора да се внимава на конкретните услови во кои одредена идеја треба да се спроведе. Ако не се земаат предвид емпириските услови, тогаш доаѓа до насилие над стварноста, чии резултати се погубни – едно е што болшевиците сакаа, друго е што стварно постигнаа. Ова предвид треба да го имаат и новите, современите болшевици.
