Mинистерка за образование и наука Весна Јаневска, денеска оствари работна посета на Универзитет „Гоце Делчев“во Штип, при што се одржа состанок со раководството на Универзитетот и релевантни локални чинители. Во фокусот на средбата беа актуелните предизвици и насоки за унапредување на квалитетот во високото образование, како и подготовката на нови законски решенија.
Ректорот на Универзитетот, проф. д-р Дејан Мираковски, истакна дека средбата била посветена на клучни теми од високото образование, особено во контекст на најавените законски измени.
„Имаме чест денеска да имаме работна средба со министерката за образование и наука, на која дискутиравме теми од областа на високото образование со фокус на подобрување на неговиот квалитет, во светло на новите законски измени кои се подготвуваат. Тоа е процес кој е исклучително важен за универзитетите и кој ќе ни овозможи да ги постигнеме резултатите што општеството ги очекува од нас – подобар квалитет на образованието и посилен сервис на универзитетите кон општеството“, изјави Мираковски.
Министерката Јаневска оцени дека средбата во Штип била конструктивна и плодотворна, при што биле отворени прашања поврзани со три клучни закони што се во подготовка.
„Разговаравме за подигање на квалитетот во високото образование преку подготовката на Законот за високо образование, Законот за квалитет во високото образование и Законот за научноистражувачка дејност, со цел усогласување околу значајни елементи кои ќе придонесат за унапредување на универзитетите и за корист на општеството, преку одлична едукација на студентите“, нагласи Јаневска.
Прочитајте повеќе на www.ugd.edu.mk
Креирано од:
СЛИЧНИ ОБЈАВИ
Заложбите на градоначалникот на Берово Петар Ружински даваат резултати: Две нови големи инвестиции во Малешевијата за подобар стандард за сите беровчани
Нова перспектива за развој на локалната економија во Пехчево
Стоп за досегашната фушерајска изградба на градежни работи во Делчево