Министерството за енергетика, рударство и минерални суровини изразува благодарност за официјалната поддршка од Секретаријатот на Енергетската заедница по повод усвојувањето на новиот Закон за енергетика во Собранието на Република Македонија. Оваа поддршка од европските партнери е силна потврда за посветеноста на нашата држава кон европските енергетски стандарди и интеграција во заедничкиот пазар на ЕУ.
Во своето соопштение, директорот на Секретаријатот на Енергетската заедница, Артур Лорковски, истакна дека донесувањето на овој закон претставува „значајна пресвртница на патот на земјата кон целосна интеграција во европскиот енергетски пазар“. Лорковски нагласи дека новата правна рамка отвора пат за интеграција на македонскиот електроенергетски пазар, особено преку негово поврзување со европскиот ден однапред и интрадеј пазар (SDAC/SIDC).
„Усвојувањето на овој закон ја потврдува силната заложба на Македонија за европска енергетска интеграција. Очекуваме следните чекори – од целосна усогласеност до унапредување на безбедноста на системот и приклучување кон заедничкиот пазар на ЕУ“, изјави Лорковски.
Новиот Закон за енергетика е резултат на посветената работа на домашни експерти од Министерството. Законот е изработен преку инклузивен и транспарентен процес, во кој беа вклучени сите релевантни чинители, вклучително и енергетските компании, регулаторните тела, граѓанските организации и академската заедница. Овој пристап овозможи создавање на правна рамка што не само што е усогласена со директивите на ЕУ, туку и ги зема предвид локалните специфики и потреби на македонскиот енергетски сектор.
Министерството ја оценува поддршката од Енергетската заедница како признание за квалитетот на законското решение и неговата усогласеност со европските стандарди. Оваа правна рамка обезбедува темел за понатамошен развој на пазарот, зголемена регионална соработка и поефикасно, сигурно и одржливо снабдување со електрична енергија за сите граѓани и бизниси во земјата.
Во следниот период, Министерството ќе продолжи со тесна соработка со Секретаријатот на Енергетската заедница за да се обезбеди целосна имплементација на законот и навремена верификација на усогласеноста. Нашата крајна цел останува целосно учество на Македонија во европскиот енергетски пазар, што ќе донесе економски придобивки, енергетска стабилност и позелена иднина за сите.
Креирано од:
СЛИЧНИ ОБЈАВИ
Николоски: Со законски измени стимулираме изградба на дата центри во Македонија
Лишени од слобода 18 возачи за безобѕирно управување возило, 12 возеле без дозвола, од кои пет малолетници, четворица под дејство на алкохол и двајца возеле без дозвола и под дејство на алкохол
Пронајдени повеќе парчиња нелегална муниција каj жител на с. Ќоселари во општина Лозово