Од Велигден до Велигден (Десанка Николова)

Од Велигден до Велигден,
секој ден Велигден да ти биде,
убост во душата да ти воскреснува,
пламенот на кандилцето
што во тебе гори,
никогаш да не ти гасне
и светлина секаде да си носиш,
радост да бидеш – сѐ радост да ти биде,
оти Велигден е радост,
оти Велигден е светлина.
И ти некому Велигден да му бидеш
и ти свој Велигден да имаш,
па љубовта да ви воскреснува
и секој ден одново да ви се раѓа
и секој ден нова надеж да ви биде,
оти Велигден е нов ден,
оти Велигден е ново раѓање,
оти Велигден е нова надеж.
И со срца љубов полни,
еден на друг да си верувате
дека само заедно цело може да сте
и само заедно планина ќе поместите,
оти Велигден е љубов,
оти Велигден е верба и доверба,
оти Велигден е победа.
И кога наутро ќе станеш
да знаеш дека прва мисла некому си
и дека прва мисла ти е некој
и еден за друг си се молите
и еден со друг во молитва се чувате,
па гнездо од љубов сте свиле,
огниште – дом да ви биде,
Велигден мириса на дома,
Велигден мириса на семејство
и со нежност топла разгалува.
Од Велигден до Велигден,
секој ден Велигден да ти биде
и ти некому Велигден да му бидеш
и ти свој Велигден да имаш!

Десанка Николова

Креирано од:

Кирчо Анастасов

administrator

ГЛАВЕН И ОДГОВОРЕН УРЕДНИК НА БРЕГАЛНИЧКИ ПОРТАЛ
Над 15 години искуство со создавање на содржина на интернет платформи: -blogspot, -facebook, -twitter, -youtube, -instagram,
Експерт за ПР активизам, фотограф, блогер, видео продуцент, CMS web дизајнер, WHM & CPanel хостинг, Систем администратор, оператор со MySQL дата бази.
Градежен инжинер, Менаџмент на проекти, граѓански активист, фармер, планинар, љубител на природата.

See author's posts