Претседателот на Демократската Партија на Албанците (ДПА), Мендух Тачи во јавноста излезе со свој коментар во врска со објавата на лидерот на ВМРО-ДПМНЕ, Христијан Мицкоски, дека заедно со пратениците од Алијанса за Албанците/Алтернатива, БЕСА и Левица формирал ново парламентарно мнозинство.
“Ова е уште еден голем театар на тие што реално немаат моќ да ги предводат политичките процеси во државава. Вчерашните актери што ги видовме на фотографијата со Мицкоски само му ги местат коцките на Заев. Можеби несвесно, но му прават платформа за негов камбек. Следната влада ќе биде на чело со Заев, “
-соопшти Мендух Тачи за „Слободен печат“.
Тој напомена дека не познава друг човек во СДСМ со поголеми капацитети од Заев
Според Тачи, албанските лидери кои вчера се сликаа на оваа фотографија скапо ќе ги чини тоа кај Албанците.
“ВМРО-ДПМНЕ е десничарска партија која не го признава и почитува ниту Охридскиот, ниту Преспанскиот договор, а во новата политичка констелација на Балканот ниту Косово, ниту пак заложбите на државава за членство во ЕУ. Алтернатива сака само да ги зајакне своите преговарачки капацитети во Владата на Заев, а Беса сака само да ги зачува своите места во Владата, па од една страна преговара со ВМРО-ДПМНЕ, а му испраќа сигнали на СДСМ за да си ги зголемат нивните идни преговарачки позиции во Владата на Заев,”
-резонира Мендух Тачи чија што партија доколку се реализира планот за пад на владата на Зоран Заев, ќе остане на маргините на политичкиот живот во Македонија, имајки ги во предвид подемот и силата на Алијанса на Албанците, Алтернатива и БЕСА..
