Во недела 20-ти Мај 2018 година во востаничкото Разловци беа одбележани 142 години од кревањето на Разловечкото востание.
Во рамки на чествувањето организирано од Општина Делчево се одржа традиционалниот планинарски марш на релација с. Тработивиште-локалитет Свети Води-с. Разловци по што продолжи централната манифестација во дворот на црквата Св. Цар Константин и Царица Елена во центарот на селото.
Во рамки на манифестацијата беше приредена изложба насловена како “Разловечки мотиви” на ликовниот педагог Антонела Манева, ликовниот уметник Петар Атанасов- Пепи и ликовниот педагог Дафинка Лазарова -Стаменковска, по што чествувањето продложи со читање на пригоден реферат за значењето на Разловечкото востание од страна на членовите на КУД “Гоце Делчев” од Делчево.
Традиционално одбележувањето продолжи со полагање на свежо цвеќе пред спомен плочата на Поп Стојан, од страна на претставници на општината и други правни субјекти и групи на граѓани со панихида на гробовите на тројцата попови учесници и поддржувачи на востанието кои се наоѓаат под тремот во црквата, за на крај да следи рецитал на учениците од ООУ „Ванчо Прке“ и ПУ на ООУ „Св. Климент Охридски“ и пригодна фолклорна програма со учество на КУД „Гоце Делчев“, ФГ „Никола Јонков Вапцаров“ и ФГ „Копачка“.
