Митот за пештерата “Коњска дупка” во село Град, делчевско

октомври 12th, 2019 Регион, Топ вести, Што да се види? коментари 551

Пештерата “Коњска дупка” во село Град е една од поубавите пештери во овој дел од државата.

Влезот на самата пештера е со голем елиптичен отвор со димензии 1,6/3.5 метри по што доаѓа поголем отвор-одаја за која се верува дека во минатото била монашка просторија во која претстојувале монаси.

Фото 01.11.2013 година
Влезот на пештерата

Фото 01.11.2013 година
Внатрешноста централната комора на пештерата

На самиот ѕид од одајата има траги на влага и натечен бакар. На еден од ѕидовите евидентен е лик на светец, во стоечка положба, како и православен христијански крст, вгравирани во карпата. Од оваа влезна одаја со два помали тунелски отвори, еден кон десно и еден кон лево човек може да се движи подлабоко во пештерата. Десниот тунелски отвор е со висина од околу 60-80 cm и движењето низ него на човек е можно со ползење.

Фото 01.11.2013 година
Централниот ѕид на пештерата на кој се забележливи траги од натечен бакар, вештачки исклесани крст и контури со фигура на свештено лице

Левиот тунелски отвор е со дијаметар од околу 80-тина cm и истиот е вертикален нагоре во пештерата, а движењето низ него е можно со специјална алпинистичка опрема. Не се знае за должината т.е. длабочината на двата отвори.

Фото 01.11.2013 година
Левиот пештерски отвор насочен вертикално нагоре од влезната платформа на пештерата

Фото 01.11.2013 година
Десниот пештерски отвор со делумно затрупан влез кој од влезната платформа на продолжува 5-6 метри хоризонтално за потоа да се насочи под косина надолу

Од северната страна на пештерата постои втор нејзин отвор кон површината кој е делумно затрупан низ кој протекуваат атмосферски води кон внатрешноста на пештерата.

Фото 01.11.2013 година
Вториот отвор на пештерата кон површината

Со постоењето на оваа пештера се поврзани голем број на легенди и преданија како и народни верувања.

Еден од најзастапените митови за оваа пештера помеѓу локалното население е дека преку оваа пештереа некогаш постоел таен премин кон Бугарија преку кој чети и комити на ВМРО преминувале незабележано од отоманските власти низ овој предел.

По формирањето на административната граница по поделбата на етничка Македонија после Втората Балканска Војна, кај локалното население дополнително се подгреал овој мит затоа што пештерата се наоѓа токму во пограничниот регион, меѓу тогашна Вардарска Македонија и Бугарија.

Во предилинденскиот период оваа пештера била заточиште на монаси и свештени лица, за што сведочат исклесаните цртежи на централниот ѕид од пештерта, како и разни археолошки пронајдоци во тек на времето кои биле експлоатирани од таму од страна на диви копачи на злато.

Пештерата “Коњска дупка” се наоѓа во непосредна близина на Археолошкиот локалитет “Градиште”, што дополнително додава вредност на самиот локалитет во неговата репрезентативност и потенцијал за искористување во функција на туризмот и економскиот развој на ова место.

Фото 01.11.2013 година
Поглед од влезот на пештерата кон Археолошкиот локалитет “Градиште”

Фото 07.05.2010 година
Поглед на пештерата од кај Археолошкиот локалитет Градоште

Со вистинска стратегија и многу мали инвестиции ова место може да прерасне во посакувана туристичка дестинација каде може да се видат восхитувачки сцени на природата и човечката креација на едно место.