Реалната слика за гасификацијата на Република Македонија е далеку поинаква од онаа која ја претставува Министерот за транспорт и врски Благој Бочварски.
Министерот Бочварски пред да започне да зборува за некаков сериозен прогрес во гасификацијата на Република Македонија и започнување на нови проекти, најпрво треба да го направи следново:
-да каже дека оваа Влада во зададените рокови кои истекоа пред една година не успеа да ги изгради гасоводите Неготино-Кавадарци-Прилеп-Битола и Скопје-Тетово-Гостивар и дека граѓаните и стопанството ги остави без природен гас,
-да ги погледне изјавите од неговиот претходник Сугарески дадени пред половина година во кои тој даваше идентични проценти за изградбата на гасоводите, според што е јасно дека од тогаш до денес нема никаков прогрес во реализацијата,
-да го погледне Буџетот за 2021 година за да види дека нема обезбедено ниту еден денар за најавените нови проекти за изградба на гасоводите Гостивар-Кичево, Свети Николе-Велес, интерконективен гасовод Македонија-Грција, интерконективен гасовод Македонија-Косово,
-иако е нов во оваа Влада, сепак треба да научи дека СДСМ додека е на власт не се испроектира ниту еден метар магистрален гасовод и не започна дасе гради ниту еден метар нов гасовод, за разлика од ВМРО-ДПМНЕ во чиј мандат започнаа да се градат четири гасоводи во должина од над 260 км гасовод, од кои едниот го изгради во целост.
И за крај, Бочварски треба да се присети дека како градоначалник на Штип уште пред една година се пофали дека ги изработил проектите за гасификација и дека ќе започнел да го гасифицира овој град, па потоа да признае дека до денес таму не е изграден ниту еден метар гасовод за дистрибуција на природен гас до домаќинствата.Вака изгледа гасификацијата која ја спроведува СДСМ и Бочварски.
