На градскиот плоштад во Охрид, со почеток од 19 часот, во петокот започна театарот под отворено небо „ Баскерфест 2018“ . Овој викенд охриѓани и туристите имаа убава можност да се забавуваат со неколку атрактивни баскер артисти и музичари.
Козани и Венди доаѓаат од Аргентина и Италија. Во точката со ножеви, Козани прецизно фрла со ножеви кон својата колешка, а публиката од оваа изведба е секогаш воодушевена. Секако ова е само мал дел од нивното баскер шоу кое содржи и жонглирање со оган.
Диого Алварес кој важи за најзгодниот магионичар на светот, доаѓа од Бразил, а во Охрид го изведе своето шоу со илузии и магични трикови.
Ферца од Аргентина е кловн и акробат кому слаба точка му се најмладите кои секогаш успева да ги развесели. Неговите точки вклучуваат акробации на високи столчиња, но и многу хумор.
Џина Циркус со нејзиниот танц со оган ги разбуди сетилата на публиката во една кратка приказна, која таа ја раскажува низ возбудлив настап
Хиро-Сан доаѓа од Јапонија, а неговото улично шоу е вистинска атракција. Комбинација од боречки вештини, неколку интересни трикови, акробации, како и вклученост на многу посетители во точката.
Оде Зуле е баскер бенд од Шпанија, чија што музика може да се окарактеризира како мешавина од шпанскиот фолклор со ска панк. Звучат одлично, а нивниот енергичен настап е аудио визуелен перформанс во кој има вклучено и цртање, кловнови и жонглирање
Овој викенд се одржа БАСКЕРФЕСТ во магичниот Охрид
