Советот на Општина Кочани едногласно одлучи Градската депонија да не прима отпад од другите општини
Советот на Општина Кочани на 54. редовна седница донесе едногласна одлука отпадот од Виница, Зрновци, Чешиново-Облешево и другите општини во регионот да престане да се носи на Градската депонија кај селото Бели сѐ до отпочнувањето со работа на Регионалната депонија во Свети Николе и до избор на постојан оператор за одржување и затворање на кочанската депонија.
Одлуката беше усвоена по дополнувањето на дневниот ред од страна на претседателот на Советот Лазо Митев, а по барање на граѓаните што протестираат на крстосницата кај селото Бели и го блокираат пристапот до депонијата за комуналните возила од соседните општини.
Пред гласањето се обрати градоначалникот Љупчо Папазов, кој истакна дека Општина Кочани е посветена на реализацијата на конечната цел – затворање на депонијата во Кочани, а еден од важните услови за нејзино остварување е изградбата на Регионалната депонија во Свети Николе, повикувајќи ги членовите на Советот при носењето на одлуките да се водат во тој правец.
На седницата едногласно беше усвоена и иницијатива да се формира надзорно тело кое, како екопатрола, ќе го контролира начинот на собирање и депонирање на отпадот од територијата на општина Кочани.
При донесувањето на овие одлуки, во салата на Советот беа присутни поголем број граѓани, екоактивисти и учесници на протестот.
Во продолжение на 54. седница, членовите на Советот на Општина Кочани ги усвоија развојните програми за претстојната 2025 година, извештајот за финансиското работење на КЈП „Водовод“ – Кочани за периодот од 1 јануари до 30 септември 2024 година, како и програмите за изведување ученички екскурзии за општинските основни училишта „Никола Карев“ и „Крсте Мисирков“.
Креирано од:
СЛИЧНИ ОБЈАВИ
Најава за Јавна расправа како патоказ за затварање на Градската депонија во Кочани
Министерството за транспорт инвестира над 1,2 милиони евра за изградба и реконструкција на водоводна и канализациона мрежа за граѓаните на Штип
Со пари од амбасадорскиот фонд на САД заврши конзервацијата и реставрацијата на Споменикот на слободата во Кочани