Врсничкото насилство може да запре само ако сите, и институции и наставници и целата заедницата, се ангажираме целосно. Но, посебно важна е улогата на родителите. Недостасува поголема грижа и посветеност од многу семејства кон своите деца. Не од сите, но од многу семејства недостасува токму таа воспитна компонента, што е основа за здраво растење. Анализите велат дека најчест причинител на врсничко насилство е семејното насилство и занемарувањето на децата.
Последниот случај на врсничко насилство покажа деца со недостиг на емпатија и со изобличени вредности. Едни се изживуваат врз дете, а други стојат настрана, снимаат и се забавуваат, наместо да му помогнат и да го заштитат. Ова е аларм за целото општество.
Токму затоа на национално ниво инициравме директни средби со родителите на децата и со наставниците. На таква средба присуствував денес во населбата Ченто. Целта е да ја подигнеме свеста, отворено да се предочат проблемите, да се слушнат предизвиците со кои се соочуваат семејствата и училиштата, како и да се разменат идеи и иницијативи за заедничко делување против врсничкото насилство. Добив предлози вредни за размислување.
Паралелно во овој период реализираме и обуки за стручните соработници во училиштата за препознавање на семејно насилство преку однесувањето на децата на училиште и за спречување на понатамошно трансформирање во врсничко. Досега се реализирани обуки за стручни соработници од 30-тина општини во Македонија, во соработка со Комората на психолози, МВР и Министерството за социјална политика, за што изразувам голема благодарност.
И да, од септември ќе следат нови мерки, меѓу кои и парични казни за родителите на учениците кои ќе извршат насилство во училиштето, но и за родителите кои ќе одбиваат соработка со училишните служби.
-соопштение на Министерката за образование и наука упатено до јавноста по повод последните случувања и инциденти поврзани со малолетници од кои се згрози целокупната Македонска јавност

СЛИЧНИ ОБЈАВИ
Николоски од Виенскиот економски форум: Економската соработка на регионот е потребна за заеднички пристап и посилна конкуренција на глобалниот пазар
Клековски: Преживувањето на предвреме родените деца е решено подобро од европскиот просек — сега редот е на превенцијата и на грижата по болницата
Здравјето почнува со добри навики: dm поддржа панел за машкото здравје и понуди dmBio и Sportness закуски на Health & Fitness Forum 2026 во Скопје