УХМР: Зголемен водостојот на Вардар

Водостојот на Вардар на сите мерни места вчера беше повисок од вообичаениот за октомври, а кај останатите реки е понизок од просечниот за месецов, информира Управата за хидрометеоролошки работи (УХМР).

Според податоците на УХМР, водостојот на Вардар кај Јегуновце е 90 сантиметри, а просекот за октомври е 50, кај Скопје вчерашниот водостој на реката е 36, додека вообичаениот е 33 сантиметри. Зголемен водостој од 16 сантиметри Вардар има и на мерното место во Велес, а кај Демир Капија е повисок за шест сантиметри од вообичаениот за октомври.

Нивото, пак, на Охридското Езеро е на 10 сантиметри од дозволеното минимално ниво (693,10 мнм), а денешната кота на езерото изнесува 693,20 мнм и е за осум сантиметри пониска од вообичаентата за октомври. Пониско ниво од вообичаеното има и Преспанското Езеро, додека кај Дојранското е забележано покачување на нивото од речиси два метра во однос на просечното за октомври.