Во рамки на караванот „Каде што срцето е дома“, министерот за локална самоуправа, Златко Перински, оствари работни посети на општините Валандово и Неготино, каде што се сретна со градоначалниците Ѓоко Камчев и Марија Нацева, членовите на советите и општинските администрации.
Во Општина Валандово, на средбата со градоначалникот Ѓоко Камчев, беа разгледани тековните состојби, секојдневните предизвици со кои се соочува општината, како и активностите што се реализираат на локално ниво. Посебен акцент беше ставен на процесот на ажурирање на базите на даночни обврзници, кој има за цел зголемување на сопствените приходи и подобрување на финансиската одржливост на општините.
Преку двата јавни повика за капитални инвестиции, во Валандово се финансираат вкупно 5 проекти, со вкупна вредност од 107.038.333 денари, што претставува значајна поддршка за локалниот развој.
„Со јасна координација и конкретна поддршка можеме да обезбедиме реален напредок во развојот на општините и подобар квалитет на живот. Со таков пристап, општина Валандово ќе продолжи со одговорно управување и засилена реализација на проекти што имаат директно и мерливо значење за локалната заедница“, изјави градоначалникот Камчев.
Во Општина Неготино, министерот Перински оствари средба со градоначалничката Марија Нацева, како и со Советот и општинската администрација, при што се дискутираше за развојните приоритети, тековните активности и можностите за унапредување на меѓуопштинската соработка.
Фокусот беше ставен на реализацијата на конкретни проекти, меѓу кои:
- два инфраструктурни проекта за реконструкција на тротоари, во рамки на Програмата за намалување на диспаритетите за 2025 година, во вкупна вредност од над 4 милиони денари;
- започнувањето на проектот „Elder-Care“ преку Интерег програмата за прекугранична соработка со Република Грција, во вредност од 128.249 евра, насочен кон подобрување на здравствената грижа за повозрасната популација;
- обезбедени 200.288.639 денари преку јавните повици за капитални инвестиции, за реализација на 13 проекти во општината.
„Во делот на проектот што се однесува на здравствениот дом, предвиден е развој на медицински кабинет во болницата како центар за рехабилитација и набавка на медицинска опрема за центарот, набавка на амбулантно возило за транспорт, преносен ултразвучен апарат, преносен ехо апарат, медицинска опрема за реанимација и друго“, посочи градоначалничката Нацева.
Министерот Перински нагласи дека „Министерството за локална самоуправа останува посветен партнер на општините и дека поддршката ќе продолжи со конкретни мерки и инвестиции кои директно ги подобруваат условите за живот на граѓаните. Политиките се креираат заедно со општините таму каде што потребите се најголеми.“

СЛИЧНИ ОБЈАВИ
Одбележан патрониот празник на ООУ „Крсте Петков Мисирков“ во Оризари
Предложен притвор за вработен во ДЗС осомничен за поткуп
Делегација на МВР учествуваше на 15. конференција на ИНТЕРПА во Доха, Катар