Претседателот на ВМРО-ДПМНЕ Христијан Мицкоски денеска напладне одржа своја прес конференција на која го истакна партискиот став и планови во врска со намерата на власта предводена од Зоран Заев да донесе закон за спроведување на политички попис на бандитски начин со злоупотреба на европското знаменце во Македонскиот парламент.
“Попис е потребно да има, но тоа е потребно да биде статистичка операција, а не политичка операција каква што се подготвува од страна на владејачкото мнозинство.”
-истакна децидно на почетокот од прес конференцијата лидерот на опозиционатѕа ВМРО-ДПМНЕ и го дообразложи во продолжение овој свој став:
“Попис е потребно да има за да можеме благовремено, навремено да го планираме развојот на економијата, образованието, здравството, земјоделието итн. Затоа што не е сеедно да пресметувате БДП од 11 милијарди евра на политички консензуален договор на население од два милиони жители и резидентно реално население од 1.5, 1.6, 1.7 милиони жители. Зошто? Затоа што тоа директно влијае врз кредитниот рејтинг на државата, а кредитниот рејтинг на државата директно удира по џебот на граѓаните, бидејќи задолжувањето кое што понатаму граѓаните полнејќи го буџетот го враќаат може да биде значително поголемо доколку статистичката операција попис е практично политичка операција каква што планира да спроведе владејачкото мнозинство.”
Дополнително Мицкоски поради заканите на пандемијата од корона вирусот врз здравјето на Македонските граѓани апелираше пописот да биде одложен за наредната година кога ефектите од пандемијата би требало да бидат намалени и посочи на позитивни практики на поразвиени европски земји кои што поради пандемијата го одложиле својот државен редовен попис.
“Поради КОВИД пандемијата ќе наведам неколку држави многу поразвиени од Македонија кои што веќе го одложија пописот. Имено, Германија пописот планиран за 2021 година го одложи за мај 2022 година. Шкотска пописот планиран за 2021 година го одложи за март 2022 година. Ирска пописот планиран за 2021 година го одложи за април 2022 година.”,
-соопшти Мицкоски.
Потоа поради нечесните намери за партизација и политизација на претстојниот попис Мицкоски упати и повеќе прашања до Зоран Заев и актуелните власти преку кои е потребно да се расчистат многу недоумици кои се појавија во јавноста во врска со самиот попис и штетноста на истиот да биде спроведен на начин како што настојува актуелната власт.
“Попишувањето е предвидено без покажување на било каков доказ и лична идентификација, да биде завршено со едноставно диктирање на матичниот број. Дали може да се случи едно лице да диктира повеќе матични броеви, без притоа да покаже соодветен доказ дека тие во моментов се резиденти односно се наоѓаат на територијата на Република Македонија?”,
-го постави очигледното прашање Мицкоски кое ја илустрира намерата на власта за да го партизира самиот попис.
Целата прес конференција на Претседателот на ВМРО-ДПМНЕ Христијан Мицкоски проследете ја во продолжение:
